Арга хэмжээний “Сод хүмүүнээс сургалцахуй” агуулгын хүрээнд тухайн орон нутагт түүхэн гавьяа байгуулсан спортын зүтгэлтэнг алдаршуулах ажлын хүрээнд аяны онцлох хүнээр Өвөрхангай аймгийн Нарийнтээл сумын харъяат МУ-ын Хөдөлмөрийн баатар, Дархан аварга Дашдоржийн Цэрэнтогтохыг онцлож байна. Д.Цэрэнтогтох нь 1951 онд Өвөрхангай аймгийн Нарийнтээл суманд төрж, 1971 онд цэргийн албанд татагдаж Ардын армийн “Алдар” спорт хороонд тамирчин болжээ. Тэрбээр 1974 онд спортын мастер, 1980 онд олон улсын хэмжээний мастер цол хүртэж, чөлөөт бөхийн дэвжээг олон жилийн турш чимэн, Бүх ард түмний спартакиадаас алт, УАШТ-нээс 6 алт, мөнгө, хүрэл медаль хүртжээ. Үндэсний бөхөөр барилдаж 1972 онд Улсын начин, 1977 онд Улсын заан, 1978 онд Улсын арслан, 1979 онд онд Улсын аварга, 1980 онд Даян аварга, 1981 онд Дархан аварга цол хүртэж, Төрийн наадамд дөрвөн удаа, Цагаан сарын барилдаанд гурван удаа түрүүлж байлаа. 1976, 1980 онуудын Зуны олимпын наадамд зодоглож, 1980 онд ОХУ-ын Москва хотод болсон Зуны олимпын наадамд 5-р байр эзэлж, ДАШТ-нд 1974-1975, 1978-1979 онуудад 4 удаа эх орноо төлөөлөн оролцсон юм. Түүний спортын талбарт гаргаж байсан өндөр амжилтыг үнэлж“Биеийн тамир спортын тэргүүний ажилтан” цол тэмдэг, МҮОХ-ны “Алтан медаль”, ойн медалиудаар урамшуулж, 1991 онд Гавьяат тамирчин, 2006 онд Хөдөлмөрийн баатар цолоор шагнажээ.
Та системд нэвтэрч орсоноор сэтгэгдэл бичих болон үнэлгээ өгөх боломжтой болно.